ភ្នំពេញ៖ សម្ដេចតេជោនាយឧត្តមសេនីយ៍ផុតលេខផ្កាយមាស៥ ហ៊ុន សែន ណែនាំឱ្យពលរដ្ឋ ជីកលេណដ្ឋាន ដើម្បីការពារខ្លួន ខណៈសម្ដេច សង្កេតឃើញ វិវាទជាមួយថៃ អាចអូសបន្លាយពេលយូរ។ នេះបើតាមសារដែល សម្ដេច បង្ហោះលើបណ្ដាញសង្គមហ្វេសប៊ុក។
ថ្លែងនៅក្នុង ពីពិធីសំណេះសំណាលជាមួយសមាជិកក្រុមប្រឹក្សាឃុំ-សង្កាត់ ស្រុក-ក្រុង ខេត្តឧត្តរមានជ័យ សម្ដេចតេជោនាយឧត្តមសេនីយ៍ផុតលេខផ្កាយមាស៥ នៅព្រឹកថ្ងៃទី២៦មិថុនា បានលើកឡើង ពីស្ថាការណ៍ វិវាទព្រំដែន ជាមួយថៃ។ សម្ដេច សង្កេតឃើញថា បើមិនមានការផ្លាស់ប្តូរមេដឹកនាំក្រុងបាងកកទេនោះ ប្រទេសទាំងពីរ អាចមានសង្គ្រាមយូរ។ សភាពការណ៍នេះ សម្ដេចធៀបទៅនឹងវិវាទ កាលពីឆ្នាំ២០១១ គឺមានភាពខុសគ្នា។
ហេតុនេះ សម្ដេចតេជោនាយឧត្តមសេនីយ៍ផុតលេខផ្កាយមាស៥ ហ៊ុន សែន បានណែនាំពលរដ្ឋយ៉ាងដូច្នេះ៖ «ណែនាំប្រជាពលរដ្ឋ ជីកលេណដ្ឋានដើម្បីការពារខ្លួន ហើយកុំភ្លេចការបង្កបង្កើនផល ទោះសភាពការណ៍កើតនៅទល់ដែនក៏ដោយ ខណៈដែលពេលនេះ រដូវវស្សាបានមកដល់ហើយ»។
ទាក់ទងការរក្សាសន្តិសុខសុវត្ថិភាពសង្គម សម្តេច លើកពីគោលនយោបាយភូមិឃុំសង្កាត់មានសុវត្ថិភាព ត្រូវអនុវត្តបន្ត ព្រោះមានសារសំខាន់ ដែលសម្ដេចចាត់ទុក អ្នកដឹកនាំនៅមូលដ្ឋានជា អ្នកជាមានឥទ្ធពល និងប្រសិទ្ធភាពខ្លាំង។ សម្ដេច ចង្អុលបង្ហាញពីសារសំខាន់នៃមន្ត្រីមូលដ្ឋាន ក្នុងការចូលរួមគ្រប់គ្រងសន្តិសុខសង្គម បញ្ហាគ្រឿងញៀន ល្បែងស៊ីសង ដែលជាកង្វល់រួម និងកង្វល់ដោយឡែក សម្រាប់គ្រួសារនីមួយៗ។
ពាក់ព័ន្ធនឹងការបិទព្រំដែនដែនដោយឯកតោភាគីវិញ សម្ដេច ហ៊ុន សែន ចាត់ទុករបៀបធ្វើការថៃ ធ្វើឡើងតាមទំនើងចិត្ត ហើយពេលបន្លែ ផ្លែឈើពួកគេខូច បែរជាសុំចរចា។ សម្ដេច ឃើញថៃសព្វថ្ងៃ ហាក់ដូចបិទខ្ទប់ខ្លួនឯង ឬកំពុងមានវិវាទជាមួយប្រទេសជិតខាងទាំងអស់ រួមមានមីយ៉ាន់ម៉ា ឡាវ ម៉ាឡេស៊ីជាដើម។
«សម្រាប់កម្ពុជា ចង់ឱ្យព្រំដែនជាមួយប្រទេសជិតខាង ជាព្រំដែនមិត្តភាពសន្តិភាព កិច្ចសហប្រតិបត្តិការ និងការអភិវឌ្ឍ»។ នេះជាគោលជំហររបស់សម្ដេច ហ៊ុន សែន ហើយស្ថិតក្នុងវិបត្តិនៃជម្លោះ រវាងកម្ពុជា-ថៃ សម្ដេចយល់ឃើញវិបត្តិនេះ បានក្លាយទៅជាកាលានុវត្តភាព។ សម្តេច ណែនាំដល់ក្រុមប្រឹក្សា ឃុំ-សង្កាត់ ស្រុក-ក្រុង ជំរុញប្រជាពលរដ្ឋដាំដុះ ដោយផលិតផលកសិកម្មប្រែក្លាយវិបត្តិទៅជាកាលានុវត្តភាព។
សម្ដេច ហ៊ុន សែន លើកទឹកចិត្តឱ្យមានការផលិតកសិកម្មនៅក្នុងខេត្តឱ្យកាន់តែច្រើន សម្រាប់ផ្គត់ផ្គង់ក្នុងខេត្ត។ លើសពីនេះ កសិផលទាំងនោះ អាចផ្គត់ផ្គង់កម្លាំងប្រដាប់អាវុធជួរមុខ។
ស្ថានការណ៍ ជម្លោះព្រំដែនកម្ពុជា-ថៃ កាន់តែតឹងតែង ចាប់តាំងពីមានការផ្ទុះអាវុធនៅទី២៨ ខែឧសភា បណ្ដាលឱ្យទាហានខ្មែរម្នាក់បានបាត់បង់ជីវិត ដោយសារភាគីថៃ ជាអ្នកផ្ដើមមុន។ បញ្ហាព្រំដែនកាន់តែក្ដៅ រហូតដល់បង្រួមម៉ោងចេញចូលតាមច្រកព្រំដែន ហើយឈានដល់បិទទាំងស្រុងនៅថ្ងៃទីយប់ថ្ងៃទី២៣មិថុនា ដោយភាគីថៃ៕ ប្រភព៖ ថ្មីៗ
