ឧត្តរ៉ាឌីត ប្រទេសថៃ (សៀម)៖ ខេត្តឧត្តរ៉ាឌីត (Uttaradit) ភាគខាងជើងនៃប្រទេសថៃ (សៀម) បានរងគ្រោះដោយសារទឹកជំនន់ធ្ងន់ធ្ងរបំផុតក្នុងរយៈពេល ៨០ ឆ្នាំចុងក្រោយនេះ ដែលបណ្ដាលមកពីឥទ្ធិពលព្យុះបន្តបន្ទាប់ និងភ្លៀងធ្លាក់ខ្លាំងមិនធ្លាប់មានពីមុនមក។ ព្រឹត្តិការណ៍នេះបានកើតឡើងកាលពីថ្ងៃអង្គារ ទី៣០ ខែកញ្ញា ឆ្នាំ២០២៥ ដោយបង្កការខូចខាតយ៉ាងធ្ងន់ធ្ងរ និងតម្រូវឲ្យមានការជម្លៀសប្រជាពលរដ្ឋរាប់ម៉ឺននាក់។

យោងតាមការផ្សាយរបស់សារព័ត៌មាន The Nation និងប្រភពផ្សេងទៀត ទឹកជំនន់បានជន់លិចផ្ទះសម្បែងជាង ២,០០០ ខ្នង នៅក្នុងខេត្តឧត្តរ៉ាឌីត។ ស្ថានភាពនៅស្រុក Nam Pat, Thong Saen Khan, Tha Pla និង Tron គឺធ្ងន់ធ្ងរជាពិសេស ដោយផ្ទះសម្បែងមួយជាន់ត្រូវបានទឹកលិចទាំងស្រុង ហើយផ្ទះពីរជាន់ក៏រងការគំរាមកំហែងដល់ជាន់លើផងដែរ។ កម្រិតទឹកជំនន់នៅតំបន់ខ្លះបានឡើងដល់ ១.៥ ទៅ ២ ម៉ែត្រ។

ភ្លៀងធ្លាក់ខ្លាំងដែលបណ្តាលមកពីព្យុះ Bualoi បានបង្កឲ្យមានទឹកជំនន់ភ្លាមៗពីខ្សែទឹកភ្នំ ដែលហូរចូលទៅក្នុងអូរ ប្រឡាយ ផ្លូវថ្នល់ និងដីកសិកម្ម។ ជាលទ្ធផល ប្រជាពលរដ្ឋរាប់ម៉ឺននាក់ ត្រូវបានជម្លៀសទៅកាន់ទីទួលសុវត្ថិភាព ដោយអាជ្ញាធរបានបញ្ជូនក្រុមជួយសង្គ្រោះ និងនាវាដើម្បីជម្លៀសអ្នករស់នៅ រួមទាំងអ្នកជំងឺដែលដេកលើគ្រែផងដែរ។

ក្រៅពីការខូចខាតទ្រព្យសម្បត្តិ ទឹកជំនន់នេះក៏បានបណ្ដាលឲ្យមនុស្សម្នាក់ស្លាប់ និង ៤ នាក់បាត់ខ្លួននៅក្នុងខេត្តឧត្តរ៉ាឌីត។ ព្យុះ Bualoi ក៏បានជះឥទ្ធិពលដល់ខេត្តចំនួន ១៧ ផ្សេងទៀតនៅទូទាំងប្រទេសថៃ ដោយប៉ះពាល់ដល់ប្រជាជនប្រមាណ ២៦៩,៣៥១ នាក់ និងបណ្ដាលឲ្យមនុស្ស ៧ នាក់បាត់បង់ជីវិត។ អាជ្ញាធរនៅតែបន្តតាមដានស្ថានភាព និងផ្តល់ជំនួយសង្គ្រោះបន្ទាន់ដល់ប្រជាពលរដ្ឋដែលរងគ្រោះ។

សូមទស្សនាវីដេអូខាងក្រោមនេះ