សម្តេចតេជោ ហ៊ុន សែន មិនចង់ឃើញការប្រយុទ្ធណាមួយកើតឡើងទេ តែគាំទ្រការសម្រេចរបស់រាជរដ្ឋាភិបាល បញ្ជូនកងទ័ព និងអាវុធធុនធ្ងន់ទៅកាន់ព្រំដែនកម្ពុជា-ថៃ ដើម្បីការពារខ្លួន
(ភ្នំពេញ)៖ នាយឧត្តមសេនីយ៍ផុតលេខផ្កាយមាស៥ សម្តេចតេជោ ហ៊ុន សែន ប្រកាសគាំទ្ររាជរដ្ឋាភិបាលបញ្ជូនកងទ័ព និងអាវុធធុនធ្ងន់ទៅកាន់ព្រំដែន។ សម្តេចតេជោ បានបញ្ជាក់ថា កម្ពុជា ស្អប់សង្គ្រាមតែបង្ខំចិត្តត្រូវធ្វើសង្គ្រាមដើម្បីប្រឆាំងការឈ្លានពានរបស់បរទេស ដូចដែលបានធ្វើកាលពីឆ្នាំ២០០៨ ដល់២០១១ ដោយប្រើមុខព្រួញ៣ គឺយោធា ការទូត និងផ្លូវច្បាប់។
សាររបស់សម្តេចតេជោ ហ៊ុន សែន ធ្វើឡើងបន្ទាប់ពីទាហានថៃ បានចូលមកបាញ់ទាហានកម្ពុជានៅព្រំដែនកម្ពុជា និងថៃ ក្នុងខេត្តព្រះវិហារនាព្រឹកព្រលឹមថ្ងៃទី២៨ ខែឧសភា ឆ្នាំ២០២៥នេះ បណ្តាលឱ្យយោធានខ្មែរម្នាក់ស្លាប់បាត់បង់ជីវិត។
សារលើបណ្តាញសង្គមដែលចេញនាយប់ថ្ងៃនេះ សម្តេចតេជោ បានគូសបញ្ជាក់ថា ព្រំដែនសន្តិភាពមិត្តភាពសហប្រតិបត្តិការណ៍ និងការអភិវឌ្ឍមិនគួរមានរឿងបែបនេះកើតឡើងនោះឡើយ ដែលសម្តេចសូមថ្កោលទោសយ៉ាងហ្មឺងម៉ាត់ចំពោះបុគ្គល ឬអង្គភាព ឬថ្នាក់ណាក៏ដោយ ដែលបានសម្រេចចិត្តឱ្យធ្វើសកម្មភាពឈ្លានពានបែបនេះ ដែលវាប្រហាក់ប្រហែលជាមួយការឈ្លានពានកាលពីឆ្នាំ២០០៨ ដល់២០១១ នៅប្រាសាទព្រះវិហារ។
បើទោះបីជាយ៉ាងណា សម្តេចសង្ឃឹមថា កាចរចាដែលនឹងត្រូវធ្វើ នៅថ្ងែស្អែករវាងមេបញ្ជាការកងទ័ពជើងគោកនៃប្រទេសទាំងពីរ និងទទួលបានផលល្អ។
«ខ្ញុំសង្ឃឹមថា នឹងមិនមានភាពតានតឹងទូទាំងបណ្តោយព្រំដែន រវាងប្រទេសទាំងពីរ រហូតដល់រាំងស្ទះដល់កិច្ចសហការលើវិស័យផ្សេងទៀត ដែលជាផលប្រយោជន៍នៃប្រទេសទាំងពីរនោះឡើយ»។ នេះជាការគូសបញ្ជាក់របស់សម្តេចតេជោ។
ហេតុការណ៍ទាហានថៃចូលមកបាញ់ទាហានកម្ពុជានេះ កំពុងនាំឱ្យមានការខឹងសម្បាជាខ្លាំងពីប្រជាពលរដ្ឋខ្មែរ។ ដោយមិនចង់ឃើញបញ្ហារាលដាលទៅជាជម្លោះជាតិសាសន៍នោះ សម្តេចតេជោ បានអំពាវនាវជនរួមជាតិ កុំពង្រីកនូវជម្លោះនេះ ឱ្យទៅជាការស្អប់ខ្ពើមជាតិសាសន៍ និងជឿជាក់លើការដោះស្រាយរបស់រាជរដ្ឋាភិបាលនិងកងទ័ពនៃប្រទេសទាំងពីរ។
សម្តេចតេជោ ហ៊ុន សែន បានសម្តែងនូវការសោកស្តាយ និងចូលរួមមរណទុក្ខជាមួយគ្រួសារសពលោកព្រិន្ធបាលឯក សួន រោន ដោយសារការវាយឆ្មក់ពីកងទ័ពឈ្លានពាន៕
